Saturday, May 28, 2011

ചില തലവെയ്പ്പ് ചിന്തകള്‍




സമര്‍പ്പണം : തലവെയ്പ്പു എന്തെന്നറിയാതെ തന്നെ ഇതൊക്കെ ചെയ്തോണ്ടിരുന്ന  അഗ്രുക്കയ്ക്കും ചുമ്മാ വന്നു കല്യാണം ഉറപ്പിച്ച തലവെച്ചു തന്ന ഹരി നെടുങ്ങാടിക്കും !!! 

ഒരുത്തനെക്കൊണ്ട് ചെലവ് ചെയ്യിച്ചു അവന്‍റെ കളസം കീറുന്ന കലാരൂപത്തെ ആണ് തലയടി അഥവാ തലവെയ്പ്പ് എന്ന് പറയുന്നത് .


ഒരാളുടെ ജീവിത ചക്രത്തില്‍ അയാള്‍ പലവിധ തലവെയ്പ്പുകള്‍ക്ക് വിധേയരായിക്കൊണ്ടിരിക്കും .സ്കൂള്‍ -കോളേജ്‌ പഠന കാലത്ത് തുടങ്ങുന്ന ഈ തലവെയ്പ്പ് മരിക്കുന്നത് വരെ ഒരാളെ പിന്തുടര്‍ന്നുകൊണ്ടിരിക്കും.


  ക്യാമ്പസ്

ഇവിടെ സ്ഥിരമായി തലവെയ്പ്പിനു ഇരയാവുന്നവര്‍ കാമുകന്മാര്‍ ആണ്

1. ഒരുത്തന് ഒരുത്തിയോടു പ്രണയം തോന്നിയാല്‍ അത് അവതരിപ്പിക്കാന്‍ ഉള്ള ഐഡിയ പ്ലാന്‍ ചെയ്യാന്‍ കൂട്ടുകാര്‍ ഒരുമിച്ചു കൂടി ആദ്യം അവന്‍റെ തല വയ്ക്കുന്നു .

2.കഷ്ടകാലത്തിന് അത് എങ്ങാനും സക്സസ് ആയാല്‍ ആ സന്തോഷത്തിനു  വേണ്ടി ഒരിക്കല്‍ കൂടി അവന്‍റെ തലവയ്ക്കും

3.ഇനി അവള്‍ക്കു വേറെ പ്രേമം ഉണ്ടെന്നു തുറന്നു പറഞ്ഞാല്‍ ആദ്യം അവന്‍റെ നിരാശ തീര്‍ക്കാന്‍ കൂട്ടം കൂടി ഒരു തലവെയ്പ്പ് .ശോക ഗാന സദസ്സ് .ഇതായിരിക്കും ഏറ്റവും കൂടുതല്‍ നടക്കുന്നതും ചിലവേറിയതും ആയ ഒരിനം .

4.പിന്നെ അവളുടെ നിലവിലെ പ്രേമം പൊളിച്ചു ആ സ്ഥാനത്ത്  അവനെ പ്രതിഷ്ടിക്കുന്നതിനായി ഒരു ഗൂഡാലോചന.അന്നും അവന്‍റെ തല വയ്ക്കും.

5.ഈ വിവരം അവളുടെ നിലവിലെ കാമുകന്‍ അറിഞ്ഞാല്‍ അവന്‍ വന്നു കൊപ്രമൈസ്‌ ചെയ്യാന്‍ വേണ്ടി ഒരു പാര്‍ട്ടി നടത്തും .അങ്ങനെ ആ തലയും നമുക്ക് .

6.ഇനി ഈ വിവരം ആ പെണ്‍കുട്ടി അറിഞ്ഞു സംഗതി കോമ്പ്രമൈസ് ആക്കിയതില്‍ നമ്മളോടുള്ള സ്നേഹം കൊണ്ട് അവളുടെ തലയും നമ്മക്ക് തരും

7.ഇനി നന്നായി മുന്നോട്ടു പോകുന്ന ഒരു പ്രേമത്തില്‍ എങ്ങാനും ഒരു തെറ്റിധാരണ ഉണ്ടായാല്‍ പെണ്‍കുട്ടിയെ സത്യം പറഞ്ഞു ബോധിപ്പിക്കാന്‍ വേണ്ടി നമ്മള്‍ കാമുകന്‍റെ തലവെയ്ക്കും

8. ഇനി ഒരു പ്രശനവും ഇല്ലാതെ സുഗമമായി പോകുന്ന പ്രണയം ആണെങ്കില്‍ ചിലപ്പോള്‍ കാമുകനോ കാമുകിക്കോ ഒഴിവാകണം എന്ന് തോന്നുന്നു എങ്കില്‍ ഇലയ്ക്കും മുള്ളിനും കേടില്ലാതെ സംഗതി തീര്‍ത്ത്‌ കൊടുക്കുന്നതിനു രണ്ടു പേരില്‍ ആര്‍ക്കാണ് ആവശ്യകത എന്നതനുസരിച്ച് അവരുടെ തലവെയ്ക്കും .

9. അടുത്തുള്ള അമ്പലത്തില്‍ ഉത്സവം , പള്ളിപ്പെരുന്നാള്‍ , ആണ്ട് ജാറം നേര്ച്ച എന്നിവ വന്നാല്‍ ജാതി മത ഭേദമെന്യേ സകലരും കൂട്ടത്തോടെ വന്നു തലയടിച്ചു കുടുംബം മുടിപ്പിക്കും .

10.സഹോദരിയുടെയോ സഹോദരന്റെയോ വിവാഹം ഈ സമയത്ത് നടന്നാല്‍  തലവെയ്പ്പ് ഫണ്ടിലെക്കായി വന്‍ അഴിമതി നടത്തേണ്ടി വരും .

അക്കാദമിക്‌ തലവെയ്പ്പുകള്‍ 

മുകളില്‍ മറ്റുള്ളവരുടെ തലവച്ചുകൊണ്ടിരുന്ന സ്ഥിരം ടീമിനാണ് ഈ അവസരത്തില്‍ പണി കിട്ടുക
1. റെക്കോര്‍ഡും അസ്സൈന്മെന്റും എഴുതുന്നതിനു പകരമായി ജൂനിയെഴ്സും ക്ലാസിലെ  ഗേള്‍സും അവരുടെ തലയടിക്കും .

2. പ്രാക്ടിക്കല്‍  പരീക്ഷക്ക്‌ ചെറിയ ടിപ്സ് തന്നു സഹായിക്കാന്‍ വേണ്ടി ലാബ് അസിസ്റ്റന്റ് എന്ന വിഭാഗം അവരെ തലയടിക്കും .

3.പരീക്ഷാ സമയത്ത് എഴുതിക്കഴിഞ്ഞ തുണ്ടുകള്‍ പാസ്‌ ചെയ്യുന്ന കഴുവേറികള്‍ അതിന്‍റെ പേരില്‍ തലയടിക്കും .

4.സര്‍ക്കാര്‍ ധനസഹായം കിട്ടുന്ന അന്ന് കിട്ടുന്നവന്മാരുടെ തലവെയ്പ്പ്  കിട്ടുന്ന തുകയുടെ വലിപ്പച്ചെറുപ്പം അനുസരിച്ച് .

5. റിസല്‍റ്റ് വരുമ്പോള്‍ ജയിച്ചവര്‍ വക കൂട്ടത്തലവെയ്പ്പ് .

ജനറല്‍ തലവയ്പ്പ്

 ഒരുത്തന്‍ കല്യാണം കഴിക്കാന്‍ തീരുമാനിച്ചാല്‍ അവന്‍റെ കഷ്ടകാലം തുടങ്ങി

1.ആദ്യം പെണ്ണ് കാണാന്‍ കൂട്ട് പോകുന്നവര്‍ അവന്‍റെ തലവയ്ക്കും

2.കഷ്ടകാലത്തിന് കല്യാണം ഉറച്ചാല്‍ അതിനു കൂട്ടുകാരും ബ്രോക്കറും വക  തലവെയ്പ്പ് .

3. പെണ്ണിനെ അമ്പലത്തില്‍ വച്ചോ ഇടവഴിയില്‍ വച്ചോ പിന്നീട് രഹസ്യമായി സന്ധിക്കുന്നതിനു ഒത്താശ ചെയ്തു കൊടുക്കുന്നതിനു ചെറുക്കന്റെ കൂട്ടുകാരനും പെണ്ണിന്‍റെ കൂട്ടുകാരിയും വക തലവെയ്പ്പ് .

4.കല്യാണ തലേന്നത്തെ തലവയ്പ്പാണ് ഏറ്റവും മാരക ശക്തിയുള്ളത് .പിറ്റേന്ന് കവറില്‍ അമ്പത്തോന്നു വയ്ക്കാന്‍ ഉദ്ദേശം ഉള്ളവന്‍ പോലും നാല് പെഗ്ഗും വയറു നിറച്ചു ഫുഡ്‌ഡും അടിച്ച് പറ്റിയാല്‍ ചെറുക്കന്റെ ബന്ധുക്കളെ ആരെയെങ്കിലും ചൊറിഞ്ഞു അലമ്പ് ഉണ്ടാക്കിയെ പോകൂ .

5. ദൈവസഹായം കൊണ്ട് പെണ്ണെങ്ങാനും ഗര്‍ഭിണിയായാല്‍ അതിന്‍റെ സന്തോഷം പങ്കു വയ്ക്കാന്‍ ഒരു പാര്‍ട്ടി നടത്തിച്ചു തലവെയ്പ്പ്

6.കുഞ്ഞു ജനിച്ചാല്‍ ആണാണെങ്കില്‍ വലിയ തലവെയ്പ്പും പെണ്ണാണെങ്കില്‍ ചെറിയ തലവെയ്പ്പും .

7.ആ കൊച്ചിന്റെ പേരിടല്‍ , ചോറൂണ് , ഒന്നാം പിറന്നാള്‍ തലവെയ്പ്പുകള്‍ പിന്നാലെ വരും .

8. പെണ്‍കൊച്ച് വയസ്സറിയിച്ചാല്‍ അതിന്‍റെ തലവെയ്പ്പ്

9.കൊച്ച് പരീക്ഷ പാസായാല്‍ അതിന്‍റെ തലവെയ്പ്പ് .

10 . എന്‍ട്രന്‍സ്‌ പരീക്ഷ കഴിഞ്ഞു അഡ്മിഷന്‍ കിട്ടിയാല്‍ അന്യായ തലവെയ്പ്പ് നാട്ടുകാരും കൂട്ടുകാരും പോരാതെ കോളേജ്‌ മാനേജ്മെന്റ് വകയും .

11.മകളുടെയോ മകന്റെയോ കല്യാണത്തിനു പഴയ കല്യാണത്തലയുടെ റീപ്ലേ .

12.ജോലിയില്‍ നിന്നുള്ള റിട്ടയര്‍മെന്റിന്റെ തലയടി .

13. കൊച്ചുമക്കള്‍ ഉണ്ടായാല്‍ മുത്തശ്ശന്‍ ആയതിന്റെ സന്തോഷ തലവെയ്പ്പ് .

14.അറുപതു വയസ്സ് ആയാല്‍ ഷഷ്ടിപൂര്‍ത്തി തലയടി .

15.കഷ്ടകാലത്തിന് പിന്നേം ജീവിചിരുന്നാല്‍ സപ്തതി . ശതാഭിഷേകം പിന്നെ നവതി അങ്ങനെ പോകും തലവെയ്പ്പുകള്‍ .

16. ഇനി ഇതിനിടയ്ക്ക് മരിച്ചു പോയാല്‍ അടിയന്തിരത്തലേന്നു മക്കളുടെ തലവെയ്ക്കും .

തലയടികളോംക്കാ സിന്ധഗി ജോ കഭി നഹി ഖതം ഹോ  ജാത്തി ഹെ !!!!!.


ഗൂഗിള്‍ ബസ്‌ കമന്‍റുകള്‍ ഇവിടെ 


1 comments:

കടലാസുപുലി said...

റോള സാഗറില്‍ കൊണ്ട് പോയി ഹരിയുടെ തലയടിച്ചു.അപ്പോള്‍ ഓര്‍മ്മ വന്ന പഴയ ചില കാര്യങ്ങള്‍ .

Post a Comment